ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានជំរុញទៅកាន់រដ្ឋមន្ត្រីនៃគណៈរដ្ឋមន្ត្រីរបស់សម្ដេចក្នុងការប្រើប្រាស់វិធីសាស្ត្រទីផ្សារដើម្បីទាក់ទាញអ្នកវិនិយោគមកកាន់ប្រទេសកម្ពុជា។
វិធីសាស្ត្រដែលសម្ដេចជំរុញនោះគឺថានៅពេលដែលរដ្ឋមន្ត្រីចេញទៅកាន់បរទេសសូមឲ្យធ្វើការផ្សព្វផ្សាយតាមរយៈការទៅជួបជាមួយនឹងអ្នកវិនិយោគនៅក្នុងប្រទេសនោះផ្ទាល់តែម្ដង ដែលសម្ដេចនិយាយថាជាការ «គោះទ្វារហៅម៉ូយ»។
សម្ដេចលើកឡើងបែបនេះនៅក្នុងពិធីបិទសន្និបាតបូកសរុបលទ្ធផលការងារពាណិជ្ជកម្មឆ្នាំ២០២៣ នៅក្រសួងពាណិជ្ជកម្ម នារសៀលថ្ងៃសុក្រ ទី២២ ខែធ្នូ ឆ្នាំ២០២៣នេះ។
សម្ដេចថាការជួបជាមួយនឹងអ្នកវិនិយោគទុនពីបរទេសកាន់តែច្រើនវាមានលទ្ធភាពកាន់តែច្រើនក្នុងការទាក់ទាញអ្នកវិនិយោគនៃប្រទេសទាំងនោះមកកាន់កម្ពុជា។ និយាយដោយខ្លីថាប្រសិនជាបានជួប ១០០ក្រុមហ៊ុន តែមានក្រុមហ៊ុនមកកាន់ប្រទេសកម្ពុជាតែ ៣ ឬ៤នោះក៏ជាជោគជ័យនៃការចរចារនោះផងដែរ។
សម្ដេចខ្លួនឯងផ្ទាល់គឺជាគំរូនៃការគោះទ្វារហៅម៉ូយនេះ តាមរយៈពេលដែលសម្ដេចអញ្ជើញទៅបរទេស។ ថ្មីៗនេះក្នុងពេលសម្ដេចធ្វើដំណើរទៅប្រទេសជប៉ុន ជំនួបជាច្រើនរបស់សម្ដេចបានជួបជាមួយនឹងអ្នកវិនិយោគនៃប្រទេសទាំងនោះក្នុងការផ្សព្វផ្សាយពីប្រទេសកម្ពុជាដើម្បីទាក់ទាញអ្នកវិនិយោគមកកាន់ប្រទេសកម្ពុជាបន្ថែមផងដែរ៕
